إلى عمار

صديقي البهيم عمار

مشطة طيبة … أما بعد … سكرت علينا اليوتوب ، و قلنا هاذاك حد المخ … الله غالب ، بهيم ويخدم على روحو ، اش بش نعملولو … سكرت الديليموشيون وطفينا الضو، قلنا ميسالش ، مازال صغير ويحب يعجب عرفو .. ميسالش هلزوز سيتات فيهم وعليهم ، فيهم البرني، وتونس مهما كانت مازالت بلاد مسلمة ، زيد إلي يحب ع البرني ، ما يحيرش ، كان ما لقى بيها وين ، توا يحط روتانا ولا ميلودي ولا يهبط للمنارات ولحمامات يشلل عينيه ، يلم حق قضية ما قبل النوم … البرني مسكر بفضل مجهوداتك الجبارة ، وسكتنا … مبعد دورتها تسكر في سيتات السياسة ولاحزاب المعارضة ، ونورمال عديناهالك ، بطبيعتنا ما نتبعوش برشة جموع الاحزاب ، وتسكر ولا ما تسكرش ، نحل التلفزة ، نلقاهم يا في الجزيرة يا في تونس 7 … توة ، والدين بوك، دورتها تسكر في البلوقات ، وجماعة فرض جماعة سنة في الفايسبوك ….

عزيزي الاحمق عمار

كثرتلها يا وخي ، ضحكت علينا العالم الكل … كي انتي همك تصويرة تونس في الخارج ، ومشاعر تونس في الخارج ، وكرارز تونس في المحافل الدولية ، ماهو سكر سيت متع لابراس ، ولا متع الشروق ، فضحونا في العالم الكل … بالله قلي ، انتي هاك لاعبها راجل ، ونهار كامل تدور ومقص في يدك ، تقول عليك حجامة ، يخي ما قالك حد إلي المقص متاعك حافي ؟؟؟ … وبرة سكرت ، انتي تسكر والعباد تزيد تهبل ، مادام مهوش بوك مولى الانترنت … بجاه ربي ، نهار ، كي ما تلقى ما تعمل ، برة فركس على كلمة « بروكسي  » عل انترنت … تلقى تعريفها إلي هي تحل المسكر ، وتحشي المقص بين ساقين مولاه … تي حتى « دادا  » ، إلي في المكناسي ، وداخلة عل 80 ، تعرف البروكسي ، ونهار كامل تخدم بيه ، تحل بيه في لعالم لكل …

حماري المصطك ، عمار

فسرلي ، شنية اللوجيك إلي خلاتك تلم
www.keezmovies.com
و- صفحة سفيان شورابي في نفس القفة ؟؟؟ تقول انتي ، الزوز يوقفوا المخ ؟؟

عمار ؟ خويا المتخلف ، طير جنح ، راك فضحتنا ، وراك قد ما تقص ، شي … ماهيش تونس 7 ولا حنبعل تيفي … راهي انترنيت يا بوقلب …