هو لا محالة يا حبذا، و معقول، و وطني جدا و الشي. أما موش كي اللي الحكاية من مشمولات وزارة الدفاع ؟؟؟ و موش كي اللي الدفاع يعتبر من أكثر المواقع حساسية في التسيير و الكل، لدرجة أنو ما يفدلكوش معاه رسميا ؟؟؟ و موش كي اللي قاعد يقول في حاجة استحالة تقنية أنو يعملها ؟؟؟ زعمة هو أحمق لدرجة ما فيبالوش بهذا الكل ؟؟؟ الساعة السيد بشهايدو، و قاري توارخ حسب شهادة أصحابو. معناها موش حكاية مصطك و هاذيكة نيتو. مالا شنية يخلي عاقل يعمل هكة، و هو على راس قطاع حساس كيف « التربية » ؟؟؟ هو صحيح، الحوماني متع الوطنية باش يشيخ عليه كي يسمعو و يقول « ملا راجل، ملا كرارز، والله و قالهالهم » (دايور أحد المشاكل اللي لازم تعالجهم التربية هو العقلية هاذي متع الوذايني).
مالا فاش قام يا جلول، الزب. هاوكا عندك پاج فان تنيك في الراس، و البلعة ولات بلاش، و الناس تحبك. هي اخدم خدمتك الزب. مبيت زغوان اللي تهردت عليه الپاجات و التلافز، مازال على حالو راهو، و السلطنية مازال مافيهاش مدرسة باش الصغار ما توليش « مبروك السلطاني » ولا اللي ذبحو. تو بجاه ربي، تخيل دولة محترمة، من هاك اللي تشيخ كي تطلع في الطيارة و انت ماشيلهم، تخيل وزير المالية متع بلاد فيهم يعمل تصريح : « والله المعلمين و الاساتذة يدهم في زبي، لا عاد واحد فيهم ياخو قرض ». راك وزير يا شيخ، موش لعب. شوية رزانة الزب.
(بالنسبة للي مش عاجبو الكلام المرزي في الحديث مع جلول، نجاوبو اللي احنا زبراطة في بعضنا، هاذي لوغتنا. هاني صابر عليه، لعل يجيبها برجلة و ينقرض).

عام على باردو.
تلامت الحريات. في بلاد، لا تنجم تصلي مرتاح، ولا تنجم تزبرط مرتاح، قاموا الخبراء يوجهو في التهمة للـ »حريات ». في بلاد تتحاسب على كلمة تقولها لعون تنفيذ و ما تعجبوش. في بلاد تنجم تختفي ستة نهارات ما تشوف حد و ما يشوفك حد، و من بوشوشة للجيول للحبس، تلامت الحريات.
هاكم تراو فيها الحريات، على كل لون يا كريمة، ملوحة مبعزقة في الشارع، ناصبين بيها في باب دزيرة.
على ما عبينا منها بزايد، الصيف اللي فات وصلو الخبراء يتساءلوا إذا كان زعمة نشوفو كيفاه ننقصو م الحريات، بالك نربحو شوية أمن.
ياخي تلامت حقوق الإنسان. في بلاد عادي تتلفت تلقى روحك مدڨدڨ و ضلوعك مكسرة على خاطر « الله غالب »، تلامو حقوق الإنسان. في بلاد مازال اغلب عبادها عايشين تحت الصفر الحقوقي (فقر، تهميش، غياب التكافؤ و المساواة بين الجنسين و في نفس الجنس)، الخبراء اعتبروا انو حقوق الانسان المسيبة كي الما ع البطيخ هي اللي عملت الارهاب. شبيك، رانا وصلنا يجيونا لاجئين سياسيين من أماريكيا و هولاندا و النرويج، اللي يقلك. معروفة تونس بحقوق الانسان. انت آقف في أي بلاصة في العالم، أي رونپوان، غير اسئل على « حقوق الإنسان » آتو ينعتوك على تونس طول.
أحنا هكاكة ما عناش، و زدنا نقصنا منهم ها الحقوق. هو كي تجي تشوف الحق، قوانيننا تبارك الله، مسبقة الخير على حساب عشرة.
تقول انت، فما شكون تقلق كيف تشدو حضبة عباد، لا علاقة، و قعدو ياكل فيهم ضرب في الڨرجاني، و مبعد كي ما ثبتو عليهم شي، و بعد ما تحطمو، لوحوهم؟؟؟
تقول انت، فما شكون تقلق كيفاه لتوة حتى لجنة من اللجان اللي تعملت ما خرجت تقرير ولا خدمت خدمة؟؟؟
لا يا ولدي، قيد على حقوق الإنسان، و كان ما لقيتهاش قيد ع « الحكوكيين ».
لوغة جديدة، موش من عند الخبراء المرة هاذي. من عند اللي ولاو طالبين الشماتة، كيف الرومان العطاشى لموتى في الحلبة. الخوف يعطش العينين، تولي تتروى بالدم. معروف المرض.
عام تعدى على باردو، و على ما تعلمنا الدرس، سوسة، محمد الخامس لوين خلط الضرب لبنڨردان و محاولة إقامة سلطة بديلة.
في الأثناء، مبروك السلطاني و الڨصرين.
في الأثناء، « هيا نرجعو كيما كنا أمان » ولات سياسة دولة.
و قيد ع « الحكوكيين ».

المجد للشهيد الكلب، ولا هو الكلب الشهيد. ما نعرفش كيفاه تسميوه في بلادكم.

آهوكا مع الضحايا، في الموزاييك.

السيد يخلص م المال العمومي (فلوسي و فلوسك في الأساس، و لو أنا محتحتين)، دراقداه من مليون في الشهر، زيدها منح، زيدها إيسونس و فلوس في التليفون و بونوات، جوست باش يخدم « ناطق رسمي ». معناها خدمتو الكلمة و حسابها، و كي يتحرك يعبر على « موقف » رسمي، فيه مينيموم متع المشترك.
لحد الآن، السيد هذا لا يزي موش يخدم في خدمتو، لا يزي وين يحل شواربو، يخرج كلمات تحاول تربط مع ماضي قطعنا معاه.
أيه نعم، سايي قطعنا مع بن علي.
قطعنا مع التبرويل و « اسكت برك، هاو 5000 خدمة ».
قطعنا مع منطق « برة برك، خوك الكبير و يعرف آش يعمل ». الحاكم ماهوش خونا الكبير، و الحاكم بالبروفة ما يعرفش آش يعمل. و الدليل شوكات ناطق رسمي.
قطعنا مع المسمار المصدد، متع « انا نقول و انت اضرب راسك ع الحيط ».
قطعنا مع منطق « انا أو الفراغ » و « انا أو الإرهاب ». الفراغ و جانا و عبيناه. الإرهاب و جربناه، و تبارك الله هاكم تراو، الدعشوش نكردوه بالحجر، المواطنين قبل الأعوان.
قطعنا مرة و إلى الأبد مع التحثويل كتمشي رسمي مشترك. حتى لو كان السياسيين و الفراشط مازال ما فيبالهمش، تو يولي فيبالهم.
قطعنا و تعدينا لزمان آخر، مازلنا نستحملو فيه بهامة الڨدم و تكركيرهم من باب الرفق بالحيوان. أما موش الكل مستعدين نستحملوهم.
حاجة كيف خالد شوكات ما عادش عندها محل م الإعراب في المشترك، ع الأقل حاليا. من حقو يتوحش بن علي كيما يحب، أما في مقال يهبطو في الشروق في « بريد القراء »، ولا في رسالة لـ »أخي عاطف » في الإعلان، موش كيف يبدا ناطق رسمي. مش بفلوسنا.
استقالة، إقالة، كونجي ماتيرنيتي، طرد تعسفي، فرز أمني، يتصرفو، أما السيد هذا وصل لدرجة اللي خلا الواحد يتوحش عدنان منصر و يتحسر ع البكوش كي كان ناطق رسمي.
أصدقائي الشانعين، صديقاتي الشانعات، فرد كلمة : ترت شوكات.

تكلم الناطق الرسمي، خالد شوكات (ليس جمع الشوكة، فالشوكة مهما قست جزء مفهوم من الطبيعة، و الشوكة الأخرى المفصلة حديدا علامة تحضر، بينما خالدنا أبى إلا أن يرفض هذا و ذاك)، و نطق باسم حكمنا المشترك الرسمي قائلا « أنا لا أحترم أمة تنفي زعماءها » بعد أن دعى بفرج الكرب عن السابق في الطغاة، بن علي.
أمة. و هل نحن أمة، في تونس؟؟؟ متى خرجنا من « غبار الأفراد و العربان » ؟؟؟ ألم نعد الهمج اللذين يحتاجون من ينزع القمل عن رؤوسهم؟؟؟ أم أنا رؤوسنا سحرية، تارة بالقمل كي نسكت، و تارة فخر الفخر بين الأمم و من العيب أن تنفي عنها الزعماء؟؟؟
أمة.أ أمة الفريجيدار، سيدي الناطق الرسمي؟؟؟ أم أن وعينا لا يعود معترفا به، إلا مطية للسارق و أخيه، و أبيه، و عمه ؟؟؟
لنفترض برهة أن بن علي زعيم، و أننا كنا من الحياء على ما طالبنا به البازق الرسمي. لا أعتقد أن الخالد بين الشوكات كان ليربح أكثر من 5 آلاف دينار تونسي في الشهر، غير الإمتيازات و المنح و نقود الهاتف و السيارة و نفطها.
لن أغرق في التحليل و النقاش. ما كان لمثل هذا الأبله أن يكون أكثر من نائب ثانوي في حزب ثالثوي، ينتقل من حزبه المكرتن إلى حزب آخر من أجل 100 دينار، كما كان الأمر أيام بوشيحة و بولحية، هاته الأسماء اللتي مسحتها الثورة من عار الذاكرة الوطنية. ما كان لمثل هذا الأبله أن يكون له فاه يصدر الموجات الصوتية بالخراء نحو الجميع. ذاك اللذي استزعمه، ناطقنا الرسمي، لم يكن ليقبل بحكومة آتية من انتخابات غير معروفة النتائج مسبقا.
لن أغرق مع هذا، فشوكات، في أحسن الأحوال، أحمق. و يوصي الكبار بالحيوانات الأليفة رفقا.
أفرج الله كرب بن علي، و أعاده لأرض الوطن. أتمنى ذلك، كي أكون في استقباله مع أبناء بلدتي المنفية بين فيافي المكناسي و منزل بوزيان، حيث قضى أبناء العم برصاص أبناء « زعيم الشوكات ». سأكون في استقباله، أنا و الحجر و أبناء العم، إن تجرأ على وضع القدم على تراب هاته الأرض.
سيدي البازق الرسمي : بلع فمك. ثم انقرض، رجاء، دون صخب. فلنا هنا بلاد نبنيها بعيدا عنك و عن المحتالين أسيادك.
انقرض هنيئا، بصمت، رجاء. أعدك، سنلعب حذو انقراضك موسيقى يتراقص لها الكون.