XXXVIII

استحالة عملية العبد اللي بعث الاتفاقيات اللي عملهم يزمرو و كسرهم، استحالة يحس روحو متهني على سرو، يبداشي متخبي في كرش حوتة.

XXXIX

في الأساس، الشي اللي نسميوه « عدل » هو نفسو في البلايص الكل : عقلية الفايدة المتبادلة. أما ترجمة الحكاية هاذي تتبدل من بلاد لبلاد، و من ظرف لظرف.

XL

إذا كان حاجة نشوفوها عادلة، و في الواقع فيها فايدة متبادلة في المجتمع، الحاجة هاذيكة عادلة بالحق. أماكانذ، إذا ما فيهاش منفعة متبادلة للجميع، تولي لا عادلة لا والو.

XLI

 إذا فما قانون، ساعات يفيد و ساعات ما يفيدش، القانون هذاكة ما يبدا عادل إلا وقت اللي يفيد. و هاذي حكاية واضحة قدام أي انسان ما يحرجوش الكلام الفارغ م المعنى.

XLII

وقت اللي، من غير ما تتبدل الظروف، حكاية حسبناها عادلة تطلع ما عندهاش فايدة حقانية، معناها الحكاية هاكي ماهيش عادلة. و إذا كان الفايدة تبدا حاضرة و مبعد كي تتبدل الظروف يولي ماعادش فما فايدة، فرد وقت تولي ماعادش عادلة.

XLIII

اللي يحب يعيش من غير ما يخاف م اللي موش بيديه، ما لازمو ينده إلا ع الحاجات اللي في مقدورو. لازم يعتبر انو اي حاجة ما ينجمش يعطيها لروحو خارج نطاقو و موش بيديه. لازمو زادة يجبد روحو من برشة حاجات ، بالأخص اللي لا فايدة من متعتها.

XLIV

اللي ڨدوا رواحهم في البلاصة اللي عايشين فيها، و وفروا منها و بيها أمان كامل، تلقاهم عداو حياتهم شايخين بالصحبة و الثيقة المتبادلة. و كيف ها الاصحاب يمشيو على رواحهم، ما يتشكا حد اللي هوما ماتوا على بكري، مادامهم تهناو مع بعضهم.

XXX

كي تبدا الرّغبة الطّبيعية في حاجة ننجّمو نتخلاو عليها من غير وجيعة، عنيفة، اعرف راهو مش م الرغبة الطبيعية. الحكايات اللي تزيدها النفس للحاجة المرغوب فيها، من غير ما تكون بالحق منها و فيها، يعملو فكرة غالطة. الفكرة الغالطة اللي عملناها لرواحنا على حاجة هي السبب في عنف الرّغبة ليها.

XXXI

الرغبات اللي ننجمو نتخلاو عليها من غير وجيعة، ماهيش متعلقة بحاجات لازمة : ماهي إلا شهوات مفرتة لهنا و لغادي، تفريقهم ساهل، بالخصوص كيف تبدا الحاجة المرغوب فيها صعيبة، و لازمك ياسر تعب باش تحصلها، ولا تلقاها سبب متع مضرة.

XXXII

من بين النعم اللي توفرها الحكمة للإنسان باش يتهنا، تقعد الصحبة أحسنها و أكبرها. الانسان ، المحدود بطبيعتو، ما يلقا السلامة و السند كان في الصحبة.

XXXIII

هي نفس الحكمة اللي بينت للإنسان اللي حتى وجيعة ماهي دايمة، ولا حتى توصل تشد و تتواصل برشة وقت.

XXXIV

الحق الطبيعي قايم على النفع المتبادل : نوع متع كونتراتو فيه اتفاق أنو ما نضروش بعضنا، بطريقة متبادلة.

XXXV

لا فما لا عادل لا ظالم بين الحيوانات، بما أنو ما بيناتهمش كونتراتو متع عدم المضرة المتبادلة. كيف كيف، ما بين الناس اللي ما حبوش، ولا ما نجموش، يتفقو على كونتراتو متع عدم مضرة متبادلة.

XXXVI

العدل في ذات نفسو ما فماش. ما فما عدل إلا وقت اللي فما اتفاقيات بين المجتمعات مهما كانت اوطانها، قايمة على عدم المضرة المتبادل.

XXXVII

الظلم في ذات نفسو ماهوش شر. الشر في هاك الخوف م اللي مكلفين بمعاقبة المذنبين.

VI

المقدرة، ولا الطاقة و القوة، اللي توفرلنا وسيلة أكثر للأمان وسط الناس، ما تنجم تكون كان نعمة باهية، مهما كانت الثنية اللي توصلنا ليها.

VII

فما ناس فركسو ع الشهرة، و اللمعان، و سلطة الاستكراز فماش ما يحصلو أكثر أمان وسط الناس. إذا كان، باللي فركسو عليه و حصلوه، وصلوا لحالة الراحة، اعرف راهم حصلوا أعز نعمة موجودة في الطبيعة. إذا كان بالعكس، لا ربحو راحة البال لا والو، اعرف راهم هوما لي كروا على رواحهم، و بالقوي زادة.

VIII

حتى متعة ماهي مضرة ولا وجيعة بذات نفسها، ولا في ذات نفسها. أما تلقاه الموضوع اللي فما حاجات ولا أشياء، كي توفر لذات، توفر معاهم أكثر وجايع و مضرة.

IX

لو كان جات المتعة تتمثل في  تلميد البنّة و الملذات اللي البشر ينجم يذوقهم ببدنو ولا بروحو، هكاكة المتع ما يفرقوش على بعضهم، و كل وحدة فيهم تسوى الاخرى.

X

كان الشهوانيين و المتمتعين يلقاو في الحاجات اللي توفرلهم المتعة دوا ضد الخوف و الرعب م الموت و الوجايع و العذاب، و يلقاو معاها زادة حدود للطمع، ما عنديش علاه نلوم على حالتهم. على خاطر، إذا كانهم في الحالة هاذيكة، اعرف راهم هانيين بالمتعة، من غير لا وجايع و لا حسرة.

XI

لو كان جينا ما عنا حتى شك خايب في اللي قاعد يصير في السما، و حتى قلق ولا حيرة قدام الموت، و كان جينا فرد وقت نعرفو الحدود متع احتياجاتنا و الحدود متع الوجيعة، راهي الفلسفة كانت حكاية فارغة ما تنفع لشي

XII

كي يبدا واحد لاطختو في قلبو مخاوف في جرة الخرافات متع عامة الناس، ما ينجم يتخلص منهم كان بدراسة و معرفة الطبيعة : من غير ها الدراسة و البحث، البنة الخالصة و الصافية تولي حكاية مستحيلة.

تقديم : الفلسفة في الأساس فكر حي، و الفكر يتعبر باللوغة. تاريخ الافكار مهم في كونو يورينا كيفاه تطورت البشرية، كيفاه خلطنا هكة توة، و زيد ينجم يورينا برشة افكار سليمة، مازال الوعي العام ما يحبش يتعامل معاها. ماهيش اسامي معقدة و تركيبات صعيبة، قدر ماهي افكار.
الدارجة التونسية، البعض يعتبرها لغة متكاملة و البعض الآخر يعتبرها ما تتجاوزش درجة اللهجة. الحق، واحد م الناس موش موضوعي هذا، على خاطر الدخلة هاذي نشوفها غالطة و ما تنجم توصل كان لإشكالات هووية و انقسام فيراجي بين متعلق بالفصحى (و وراها الانتماء الثقافي العربي) و بين شكون يحب ع الدارجة و إلا أي حكاية غير العربية من باب الانسلاخ. انا نشوف فيها ع الأقل طريقة ناجعة باش الواحد يهبط الافكار و الفلسفة م السما الأكاديمي المكذوب، و يمشيهم ع القاعة وسط العباد.
على خاطر هذاكة علاه موجودة الفلسفة في الأساس : باش الناس تفكر بالسليم. و بما أنو نعتبر انو في ها البلاد ناقصين ياسر معرفة و ثقافة، لذا يظهرلي ما فيها باس لو كان نبدا نترجم في أمهات الكتب متع الفلسفة (ولا الأصح، اللي نعتبرهم انا أمهات كتب. ماهي إلا تركينتي قبل كل شي، نعمل فيها كيما نحب).
الكتاب لولاني هو مجموعة نصائح/حكم متع سي إيپيكور (أبيقور في كتب العرب). سي إيپيكور هذا كان مفكر اغريقي (يوناني معناها، أما يوناني قديم. اهوكا تحسها موهرة اكثر) معروف، أسس بطريقتو في الحياة و التفكير مدرسة كاملة اسمها الإپيكورية (ولا الأبيقورية، انت و كيفاه يساعدك تنطقها) قعدت قرون مؤثرة ع الانتاج الفكري و الادبي و الفني و السياسي. مانيش باش نعمل ملخص لحياتو، أما هاوكا الويكيپيديا للي يحب يزيد يغرق في الموضوع أكثر.
كتاب النصائح و الحكم فيه 44 نصيحة/حكمة ، باش نحاول نهبطهم على تسعة نهارات، كل نهار 5 كعبات مترجمين بالدارجة، و في النهار العاشر، قراءة نقدية و رابط للكتاب كامل مترجم بالدارجة.
الحاصل، نسكت انا و نخلي البلاصة لسي أبيقور خلي يحكي.

الكتاب 

I

الكائن المتهني و الأبدي ما عندوش حتى وجيعة لا لروحو لا لغيرو، لا يتغشش و لا يعدّل على شي : الأحاسيس هاذي علامة ضعف. 

II

الموت ما تعمللنا شي. الحاجة اللي تتفريك و تتفتفت و تتحلل ما تحسش. و الحاجة اللي ما تحسش ما عندها ما تعمللنا.

III

المتعة القصوى هي التخلص من كل ما يوجع : كل وين فما متعة، مادامهي موجودة، لا فما لا وجيعة لا حزن.

IV

حتى وجيعة في البدن ما تقعد برشة من غير ما تقص ساعة ساعة : كان الوجيعة وصلت لأعلى مستوى راهي عاد قريب باش توفا، و كان تقعد برشة أيامات باز فما فيهم أوقات راحة. الأمراض اللي يدومو برشه، فيهم أوقات راحة ممتعين لدرجة أكبر من درجة الوجيعة كيف تاذي و تضر.

V

الواحد ما ينجم يعيش متهني إلا ما يتبع الحذر (ردان البال)، النزاهة و العدل، و ما تنجمش تطبقهم و ما تكونش متهني : هكاكة اللي ما يردش بالو، ماهوش نزيه و ماهوش عادل، ما ينجم يكون كان تاعس و تاعب في حياتو.

Epicure